AV demeurant pour nous faire ſouuenir que le Somme reſſemble fort à la mort, & que tout ce qui eſt ſubiect à dormir, doit auſſi prendre fin quelque iour, ils ont enſeigné que le Somme eſtoit vn Dieu, frere de la mort, & l’ont appellé tres-plaiſant & tres-agreable, fort ſemblable à la mort, donné des Dieux aux eſprits, non ſeulement afin que par iceluy ils recouurent leurs forces haraſſees par le trauail : mais auſſi pour nous repreſenter tous les iours deuant les yeux cet aduertiſſement : Que dormans nous ſommes l’image & la ſemblance de la mort.