De Proſerpine.

LEs Anciens ont mis en auant les fictions de Proſerpine pour exprimer la nature des ſemences & plantes : laquelle ſejourne ſix mois ſous terre, & ſix mois ſur terre. Par ce moyen ils enſeignoient comme la vertu des Plantes a ſix mois de l’annee pour s’eſtendre & dilater en branches à cauſe de la froideur enfermee ſous terre durant la chaleur de l’air, & que les autres ſix mois quand l’air refroidy chaſſe la chaleur ſous terre, leur vertu y demeure encloſe ; car la nature communique à tous animaux & corps naturels les forces en telle ſorte qu’ils s’en ſeruent, & les exercent les vns aprés les autres, comme auſſi le iour eſt deſtiné pour trauailler & faire ſes affaires, & la nuict pour ſe repoſer.