Du Genie.

LE Genie eſtoit vn Dæmon, non par lequel les hommes viuoyent, ou qui fuſt touſiours prompt à les ſecourir en leurs affaires ; mais bien celuy qui leur fourniſſoit de bons conſeils ſelon l’aduis duquel ils conformoient toutes leurs actions. Mais d’autant qu’ils aſſignoient auſſi vn Genie particulier à beaucoup d’autres creatures, comme aux plantes & beſtes qui n’ont que faire de conſeil ; il ſemble que l’aduis de ceux qui penſent qu’on ait appellé Genie la vertu occulte des Pla- netes qui ſecretement nous incite & poulſe à l’appetit de generation, ſoit plus vray-ſemblable, comme de faict le mot de Genie vient d’engendrer. Ainſi doncques ils ont voulu montrer que tout l’eſtat de ce monde eſt gouuerné par vne vertu celeſte, & qu’il n’y a rien où la puiſſance de Dieu ne penetre.