OR les auteurs des fables ont exprimé les effects du Soleil par autant de manieres que bon leur a ſemblé : quelquefois il ſe prend pour la moiſſon, comme Proſerpine, qui par compoſition faicte auec Venus iouït ſix mois de l’annee de la perſonne d’Adonis, & de Venus les autres ſix ; parce que les ſemences ſont vne partie de l’annee en terre, & l’autre partie Venus les tient, c’eſt à dire, la temperie de l’air iuſqu’à ce qu’on les moiſſonne : quelquesfois il ſe prend auſſi pour le Soleil meſme, qui pour cette raiſon eſt tantoſt au ciel en haut, tantoſt aux enfers en bas : car quand le Soleil ſe tient és ſignes Meridionnaux, durant les courtes iournees, c’eſt alors qu’Adonis faict ſes ſix mois aux enfers ; puis quand les autres ſignes Septentrionnaux nous ramenent les longs iours, alors il va trouuer Venus qui rend aux terres leur beauté & bonne grace. Ils diſent qu’il mourut de la morſure d’vn Sanglier ; à cauſe de l’hideuſe violence de l’hyuer, durant lequel il ſemble que le Soleil manque de courage & de force, & alors la terre deuient hideuſe & inutile, comme nous voyons, pour les ſemences.