MAis celuy lequel aura appris de ſupporter en patience tels changemens & reuolutions, veu qu’il faut paſſer par là, cettuy-là eſt eſtimé ſage, & en remporte beaucoup de profit & d’honneur. D’autre coſté celuy qui ne ſe peut accommoder paiſiblement, ſon mol & laſche courage le precipite, comme Hellé, en vne mer ineſpuiſable de miſeres & pauuretez, au lieu que celuy qui ſçait ſagement faire ſon profit de l’eſtat preſent, approche de fort prés à la nature des Dieux immortels. Que s’il en abuſe par imprudence & fierté ; il eſt en fin par le conſeil des Dieux debouté du plus haut grade d’honneur & de puiſſance qu’il auoit atteint, d’autant que Dieu reſiſte aux orgueilleux & hayt les cruels.