Des Serenes.

VOulans par cette fabuloſité montrer qu’il faut euiter pareſſe & negligence en ſes affaires, ils ont enſeigné par la ſuauité des chanſons des Serenes, qu’elle attrait vn chacun & l’engeole, le precipitant puis-aprés en vn tres-eminent danger de ſa vie. Les autres par icelles entendent les voluptez filles d’vn pere cornu & taurin, c’eſt à ſçauoir d’Achelois, & par leur double nature, de beſtes, & de filles, ils ſignifioient les deux facultez de l’ame, à ſçauoir celle qui obeit à la raiſon, & celle qui appete ſans raiſon, qui ſe range à elle, eſt homme : qui ne le fait pas tient le beſte, car la ſeule raiſon fait l’homme. Et puiſque noſtre eſprit eſt agité de diuers mouuemens, chaſcun de nous à bon droit a des Serenes encloſes en ſoy-meſme. Quiconque dont ſuit le cours de ſes mouuemens illegitimes, il ſe void finalement embaraſſé d’extremes miſeres & pauuretez : & pourtant il faut eſtoupper ſes oreilles de peur d’oüir leur chant. Les autres par elles entendent les flatteurs, plus douce, mais plus pernicieuſe peſte qui puiſſe affliger le genre humain.