Sottu a l'alzi, a l'ombra fresca
Corre l’acqua in la filetta ;
In li campi cume l'esca
Brusgia u fenu, e lugliu jetta,
A vampate carche a focu,
L'aria accesa indi stu locu.
Stese intondu ad una leccia,
Duva u sole un po’ tuccà,
Capre sazie d’erba e veccia
Si so' messe a mastucà.
Si la godanu le tose,
E di sonnu so’ bramose.
Ghjace in mezzu ad elle un cane
Filicatu e codi-mozzu ;
Cun le jambe magre e strane
E' daveru bruttu e sozzu.
Ellu pensa, e cun stu caldu
Brama u frescu di lu valdu.
Un si vede micca ciatte,
Dorme u 'rillu in li stiglioni,
Le buciartule so' piatte,
E so' muti li piugoni ;
Chjente e bestie, tuttu jace
Sottu a u celu, in santa pace.
Sole l’ape ardite e gialle
A u travagliu dipoi l'alba
Vanu in cerca per le valle
Piene di muchju e di malba.
U calore ch'un s'affrena
Manca stampa li dà pena.