A tutti i Mei.
Spuntat’è l’alba, e da e cime di Libbiu
A strascinella fala versu i pini
Ficcati fieramente, stretti e fini,
Una striscia di luce. Una campana
Sona l’Ave Maria a u campanile
D'Arburi. L’agula chi face u nidu
Nant’à u monte Pinzutu in lu Castaldu
Spicca lu volu pront’à la rapina,
E parte pa la pesca matutina.
U mar di Liamone è calmu e bellu,
I scogli, da luntanu, a fiore d’acqua.
Bruni, allungati e cume vioti in mezzu,
Parenu tante barche senza vele.
Une torra si scopre chi rammenta
Un passatu di gloria e di battaglie :
Assalti sarracini o jnuvesi,
Tradimenti, scunfitte, urli e ghjasteme
Di suldati firiti in pienu pettu,
Sanguinosi. ma ritti, ma superbi,
O Corsi
Sparit’è l’ombra chi cupria e vigne
E i campi cinarchesi. Sopr’à i tetti
Di le case d’Ambiegna e Calcatoghju
U sole sparghje u so mantellu d’oru.
U stradone chi corre versu Ajacciu.
Si piatta dopu San Sebastianu,
Francu ch'ell’ha la jesgia di lu collu,
Poi piglia la falata a tronca collu.
Di fogu copre l’elpe, annega i monti ;
E certe case a Letia e certe a Rennu
So cusi belle sparse in li castagni
Tocche da i primi raggi di lu sole.
Bianche so’ le facciate e rossi i vetri
Chi parenu da qui tizzoni accesi.
E pò, carchi di luce, ecculi tutti
l monti amati, ricchi di fureste,
Di macchje, d’acque fresche e di ricordi.
A vedeli cusi tamanti e fieri,
L’unu a cavallu a l’altru, diciaristi,
Ch’elli vanu a l’assaltu di lu celu !
Si spartanu l’acelli : fischi e canti
Di capinere e di pincioni ; chjama
Rispondi di parnice sparucciate ;
Lamenti di ranochje sott’a l’alzi ;
Salti di rilli dentr'a stoppia ; frombu
Di cavalli mullati e chi laziosi
Corran’a coda ritta in mezzi prati ;
Bêli di capre e son di campanelle ;
Voce di pasturelli allegri ; abbaghj
Di jagari di caccia, e fucilate
Tirate in piaghja o più vicinu in Mela ;
Brioni di piugoni spavintati ;
Colpi d’ale in le scope ; martillate
D'un picchju capi-rossu e Iongu-beccu
Chi cerc’â tafuna un ghjambone seccu ;
Strunchizzume di legne sott’a i pedi
D’animali cappiati pa la macchja
Chi parte da lu fiume e sbocc’â u Masciu,
Chi circonda u castellu ruvinatu
Di quale fu signor l’eroe corsu
Ghjuvan Paulu Leca, mortu a Roma
E suppillitu in San Francesco in Ripa.
E si sente un ador di mucchju frescu.
E pò tutti sti gridi e sti rumori,
Colti da u ventu, uniti e mischjati,
Pruducian’una musica divina.
E cun elli, in lu ventu, passa, eterna,
Nobile, bella, fiera e fida sempre
L’anima di la Corsica. Mi parla...
A sentu… E lu me’ cor trema di gioja,
E mi mettu in ghjnocchie par amalla.
U sole è altu e d’Arburi le case
Chi s’eranu la notte, l’una a l’altra,
Strinte par dorme megliu sott’e stelle,
Si so’ lintate. Possu facilmente
Cuntà, senza sbagliammi, tetti e piazze.
Una ne vegu, alta e muri grisgi,
Duv’ell’è mamma cu le me surelle
Antonia, Agata e Marta, e c’è Filippu,
U me fratellu, e po’ cinque cugini.
Babbu l’ha fatta fa, ma babbu è mortu.
Da a jornu ch’ellu dorme in campusantu,
Duve d’aprile nasce u talavellu,
Duve fiurisce u mucchju muscatellu,
Duve m’aspetta lu riposu etemu,
Eju possu di ch’in casa nostra a gioja
Ghjunta un n’è più senza faldetta nera...
Altu è lu sole e la vita ripiglia.
E donne vanu a l’acqua a la funtana,
Cu la tinella in capu o a cerra in manu,
E l’omi, cu le bestie innanzu, vanu
A i campi a travaglià. E li zitelli
Correnu pa le strette e sott’a e ripe
Facendu fughje i jalli e le jalline.
Avà è tuttu luce u me paese.
U venticellu di sittembre piega
E punte di l’alive e di li piobi.
A croce di la jesgia, in pienu celu,
Cume par binadisce e cunsulà,
E duie braccie rughjnose allarga.
A pace sia cu boscu, o paisani
Chi state in casa votra e chi bardate
A tarra ind’elli so’ li nostri morti !
Repris dans