Voceru
A sera di l’intarru di u babu
Culomba della Rebbia sola in la
so' casa piena di bughju, cantà.
Aria : O Matteu di la surella...
Hanu spentu li cironi,
E sarratu hanu la tomba.
U rumore di la cascia
In lu core mi ribomba.
Babu è mortu. Orsu è luntanu,
E so' trista cume l’ombra.
Stanghillata sta la porta,
E so' chjusi li purtelli.
Micca lume e micca luce
Duve stanu l’urfanelli ;
Ma la notte, cume mè
Nera e carca di flagelli.
Ch’ellu dormi lu paese
Fin’à l’esce di lu sole ;
Veghju eju, la disgraziata,
Sola cu lu me' dulore.
Ma so' secchi li me' occhj.
E nun mi trema lu core.
U me babu si n’è andatu
Duv’ell’è nostru Signore.
L'hanu tombu a tradimentu
Omi falsi e senza onore.
Maladetta sia la razza
Chi mi dà tantu dulore.
Brutta razza di vigliacchi,
S’è tre volte maladetta.
Sete tre li Barricini,
Sete tre pa la vindetta,
A vindetta sacra e santa
Chi Culomba deve fà.