Trésorerie ou cabinet de la route marinesque

A Monsieur [Bonaventure d’Aseville, 1601]
Monsieur de Vic Conseiller du Roy treschrestien en son Conseil d’Estat, capitaine de cincquante hommes d’armes de ses ordonnances, & Gouverneur de Calais & pays reconquis.
Monsieur,
Ceux qui veullent bien approprier les choses a leur poinct, dedient ordinairement les livres aux personnes qui se plaisent aux matieres dont ils traictent : Ce livre Monsieur traicte de la navigation, science aultant excellente comme importante & necessaire, excellente, en tant qu’elle nous conduict a admirer les merveilles du Seigneur, lesquelles (comme dict le Psalmiste) il a constitué en la mer, & quelle plus grande merveilles [sic] comme il dict aussi qu’il a planté la terre au milieu, [sic] des eaux, elle nous mene aussi comme par la main a recognoistre au clair la providence de Dieu, qui a si dextrement composé de tant de choses de nature [sic] si differentes, un reiglement si asseuré pour trouver une conduicte au milieu des laberintes & obscuritez, Nous voyons la mer comme toucher le Ciel, en tant que la Lune se grossit & diminue comme elle, nous voyons les deux Estoilles les plus proches des deux Poles, qui nous servent de guides pour voyager par tout l’univers, & par la mesure des degrez & ce qui en depend, nous cognoissons les lieux & les distances. J’ay dict que ceste science est importante & necessaire, & quelle plus que la navigation ? qui est la liaison du genre humain & de la cognoissance du Monde : Scaurions nous sans elle quel il faict non par dela la ligne Equinoctiale, mais a l’autre bout du Monde ? Ceulx de la terre ferme auroyent ils cognoissance des Isles, & ceulx des Isles de l’autre ? Aurions nous tant de choses si excellentes & necessaires comme les drogues & aultres remedes pour la santé de l’homme sans el- (* 2 °) le, qui viennent de si loingtains pays ? en temps de sterilité & famine n’estce point elle qui donne secours, en apportant de bien loing les defautes soit de grains vin ou sel : En fin ceste science (hors mis la sacrée) se peult dire surpasser touttes les aultres, & nommer la plus excellente importante & necessaire, je dis maintenant qu’elle est plus en perfection que jamais : Car du temps de la sage antiquité, j’entens de ces grands Philosophes & Naturalistes, que nous celebrons tant, on reputoit l’extremité du Monde, ce que nous scavons n’estre encore le milieu, science non seulement propre a une commune, mais digne des plus braves Roy, Princes & grands Capitaines, puis, que les entreprises de guerres, les plus hautes & genereuses, se sont faictes de tous temps & se peuvent encores faire par la mer, & comme il se peult justement lamenter, que les François passez trente ans au lieu de s’entretuer, n’ont employé leur valeur & dexterité a la recherche des pays estranges, lesquelles adjoingnons utillement a ceste Couronne ou y pouvoir attirer les peuples au Christianisme ? chose vrayement digne du glorieux tiltre de Treschrestien des Roys François. Aussi se peult il sagement proposer qu’oultre ces deux raisons, il seroit a propos & presque necessaire en ce temps present pour la conservation mesme & bien de la France, de dresser une semblable entreprinse par mer, & ne penserois m’abuser de dire qu’en cela on pourroit remedier a une contagion s’augmentant de jour en jour, laquelle menaçe la Françe, mais comme tels affaires doibvent estre proposez, consultez & debatuz, par gens qui entendent non seulement les affaires d’Estat & de la guerre en terre, mais aussi la Navigation la situation & nature des pays, peu (peult estre du Conseil du Roy) gousteront une telle entreprise, & comme vous avez Monsieur, cest honneur d’en estre & qui desja depuis que vous estes en ce Gouvernement, avez assez faict paroistre que vous prennez plaisir en la Navigation, & ce qui en depend, puis que vous avez faict venir de Diepe (reputée comme l’escolle des bons Pilottes de ce Royaume) un de ceulx qui en faict leçon aux aultres, pour vous y instruire & en la cognoissance des Globes Celestes & Terrestres, C’est pour cela Monsieur que j’ay entrepris de vous presenter & dedier le traslat en François d’un Livre faict en Flamand intitulé le Tresor de la Navigation, œuvre si accomply qu’on peult dire comprendre la moelle, la substance & la quintessence de ce que tous les devanciers en ont escript, aussi que je scay que non seulement tous jeusnes Gentilzhommes de bonne Maison, qui vous sont envoyez pour estre icy dressez aux armes, a vostre imitation pourront s’addonner a ceste science : Mais d’aultres de plus d’aage, (* 2 r°) pour avecq le temps se rendre capables par le moyen de la Navigation, a faire service au Roy & a leur patrie, recevez le doncq Monsieur de bonne part, aveq priere au toutpuissant qu’il vous conserve.
Monsieur en toute prosperité, A Calais ce 24. Janvier 1601.
Vostre treshumble serviteur
Bonaventure d’Aseville. (* 2 v°)