Édition : 1550 - Hecatomgraphie - [Harsy]

- GILLES CORROZET PARISIEN AUX BONS espritz & amateurs des lettres :
Voulant (Seigneurs) ce petit livre faire
Pour au vouloir des muses satisfaire,
J’ay à par moy pensé bien longuement.
A ce qu’on dict assez communement,
Qu’ilz sont assez voire trop de volumes
Tant d’imprimez que d’escriptz par des plumes,
Et que plus sont de livres que lecteurs,
Plus de lecteurs que vertueux facteurs,
Plus d’escripvains & plus de bien disantz
Que de auditeurs & que de bien faisantz.
Cela pensant ma main qui estoit preste
Pour commencer à escripre, se arreste,
Joignant avecq la sentence premiere
Que on ne mect riens maintenant en lumiere
Qui n’ait esté ou veu ou deguisé,
Mais en voyant que n’est point desprisé
Le bon ouvrier qui l’ouvrage varie,
Comme ung orfevre en son orfaverie.
Qui d’un argent faict ung pot, une ymage
Puis en changeant & deguisant l’ouvrage
Il en faict tout ce qui luy vient à gré.
Ainsi suyvant celluy en mon degré,
Je ne doibs pas aulcun blasme encourir,
Si j’ay voulu encercher & querir
Ce qui fut dict des gens de bon scavoir
Le deguisant, pour mieulx le faire veoir
Plus richement, comme on faict par raison
De vieulx mesrien une neufve maison. De tant d’escriptz, on scait & nul le nye
Qu’un bon esprit qui les lettres entend
A se monstrer de jour en jour pretend
Pour bien d’aultruy, & affin quil ne meure
Comme ignorant, duquel il ne demeure
Sinon le corps pour estre entre les vers.
De tant d’escriptz soit en prose ou en vers
Ne sont aulcuns si foibles ou petis
Qu’il [sic] n’ayent en foy attrayantz appetis
Pour l’ung ou l’autre, en sorte que chascun
A son plaisir en peult trouver quelqu un,
Et n’y a livre ou escript qui n’apporte
Fruict ou plaisir, voila qui me conforte
En mes escriptz, & qui me a advancé
De poursuyvir mon propos ja pensé,
C’est ce livret qui contient cent emblemes,
Authoritez, Sentences, Appophthegmes
Des bien lettrez comme Plutarque & aultres
Et toutesfois il en y a des nostres
Grand quantité, aussi de noz amys
Qui mont prié qu’en lumiere fust mis
Pour le plaisir qu’on y pourra comprendre,
Et pour le bien qu’on y pourra apprendre. Et s’il vous vient à gré, & il vous plaist
De vray sera occasion entiere
De mettre au jour quelque belle matiere. (A1v-A2v)

- Huictain.
Quand vous serez à vostre bon loisir
Et que n’aurez pas grandement affaire,
Quand vous vouldrez prendre quelque plaisir
Et a l’esprit par lecture complaire,
Quand vous vouldrez scavoir quelque exemplaire
Propos moraulx de la philosophie,
Et ce qui est maintesfoys necessaire
Lisez dedans cest Hecatomgraphie. (A2v)
Retour à la version réduite