Trésor de dévotion traitant de plusieurs belles vertus

Honte est à celuy et est digne de reprehension qui a plus grande congnoissance, a laquelle respond, plus grande ingratitude, comme ainsi soit qu’a plus grande congnoissance soit deue pour raison naturelle plus grand amour. Tresdoulx Jesus les livres sont pleins de la congnoissance que nous devons avoir de vostre sacrée majesté et divinité, et de vostre père eternel. Et le sacré evangile escript est painct avecques le sang de vostre tresprecieuse humanité : afin que vous [sic] congnoissons et vostre noblesse et perfection, et la grand amour duquel nous avez aymez et aymé tousjours.
Pleins sont les livres, monseigneur. Plein est ce monde de pecheurs et trompettes, qui sont tout ce (qu’en vous monseigneur avez creé [sic]) qui tous apprend et enseigne vostre vertu et excellence, et nous incline à vous aymer et honnorer, et à vous rendre graces et congnoistre pour nostre createur et père tresaymé. Et ce nonobstant monseigneur nostre cœur est tout plein d’ingratitude, oubliance, despris et mescongnois- (A 2 r°) sance de vous : parquoy seigneur il n’y a aucun qui vous cherche, ainsi tous fuyent de vous en la religion umbrageuse de peché. Et pource monseigneur cestuy vostre indigne serviteur, afin que vous soyez congneu, aymé, servy et honoré de voz creatures : avec vostre benediction et grace, ay ordonné ce petit livre pour emouvoir à vertu et saincteté voz serviteurs les religieux soubmettant amende et correction de meilleure verité tout ce que je diray. Le posant au plus bas lieu du sein de la tressaincte et immaculée foy catholique[.] Et pource monseigneur que aujourd’huy pour noz pechez est tant grande nostre repidité [sic], et avons l’appetit de vraye amour tant abbatu, nous avons besoing (monseigneur) de secours et ayde pour nous inciter à vous aymer. Et pource tout ce present traicté sera pour manière de parabole, ou similitude : voulant tenir la façon que vous, monseigneur avez tenue : mettant souventesfois similitudes et paraboles. (A 2 v°)