Sermons ou Trésors de la piété chrétienne

Monseigneur,
Plusieurs voyans un simple et pauvre Religieux tel que je suis, offrir des Thresors à vostre grandeur, me jugeront par cette action avoir plus de temerité que de congnoissance de moy-mesme : toutefois ils diront ce qu’il leur plaira : je leur respondray que je ne pouvois plus dignement presenter ces Thresors qu’à vous, (A 2 r°) (Monseigneur) de qui l’ame, l’esprit, et le corps sont les Thresors generaux des dons de Dieu, du Ciel, & de la Nature desquels vous estes tres advantageusement partagé ; Vostre ame se fait voir richement ornée des divins Thresors de la Pieté, car sçachant que la premiere & plus belle, & noble marque d’un bon Prince, c’est de servir & de craindre Dieu, selon le dire de Moyse, & d’avoir un soin particulier pour la Religion, comme dit Tite-Live : vous faites paroistre cette vertu dans le zele tres ardent que vous avez pour le service de la saincte Eglise Catholique, Apostolique et Romaine, & pour la reduction de ses ennemis, comme il a paru en la conversion de quelques celebres & doctes personnages qui ont l’honneur d’estre vos domestiques, maintenant heureusement convertis à l’Eglise Catholique, par la force de vos raisons, desquelles ils confessent (A 2 v°) avoir esté vaincus : mais je leur sçay bon gré de le dire ; car c’est honneur à Turne de flechir soubs les armes d’un si grand Ænée, en la victoire duquel le bonheur des vaincus n’est pas moins grand, que la gloire du vainqueur. Vostre esprit encore est reconneu de tout le monde tres riche des Thresors du Ciel, que vous descouvrez journellement devant tous ceux qui ont l’honneur d’entendre vos belles & puissantes raisons, subtiles reparties, promptes responces, judicieux conseils, & graves discours, remplis d’une suave et ravissante éloquence, tant en matiere de controverses, ou d’affaires d’Estat, que de Sciences naturelles, desquelles il semble que la cognoissance soit née avec vous, tant elle vous sont familieres, & tant familierement vous recevez & favorisez ceux qui font profession de la science & vertu : Imitant ce grand Alexandre, qui avoit (ã 3 r° sic pour la minuscule) tousjours Homere & son épée sous le chevet de son lict : l’invincible Cesar qui s’est acquis autant d’honneur dans l’Academie de Minerve, que dans le champ de Bellone. Mais si le Ciel vous a esté prodigue de ses Thresors, la Nature ne vous a pas esté moins liberale de ses dons ; vous faisant naistre premier Prince du Sang, avec un corps adroit, dispos, robuste, & vaillant, & un cœur magnanime, qui vous rend infatigable aux travaux de la guerre ; dans lesquels vous vous estes acquis un renom immortel ; car en ces derniers troubles et desordres, vous avez si fidellement & genereusement servy le Roy en qualité de Lieutenant general de son armée, que vous avez tesmoigné à la France que vous estiez le fidele Thesée de son grand Hercule, & le vaillant Ajax de son victorieux Achille, Je ne doute point que ces beaux tiltres ne vous soient tres-agreables, & tres-chers ; car vous (ã 3 v°) sçavez que ce sont les plus glorieuses qualitez qui puissent orner vostre chef sans lesquelles la grandeur de vostre naissance ne vous donneroit pas tant de serviteurs que vous en avez, qui sous ces belles qualitez desirent passionnément vous honnorer & servir. Or si j’avois autant de pouvoir que j’ay de bonne volonté, j’aurois assez d’ambition pour prendre une des premieres places dans une si honorable & grande compagnie : mais n’ayant que la seule affection, je l’employeray à prier Dieu de tout mon cœur pour vostre prosperité, & augmentation de vostre gloire dans le service du Roy & de son Estat ; & afin qu’il luy plaise vous donner tousjours un bon conseil, libre, veritable, & fidele, & conserver ces deux petits rejettons des fleurs de Lys, ce jeune Apollon, & cette petite Diane, que sa bonté divine a fait (ã 4 r°) naistre dans le firmament de vostre maison tres illustre, pour la rendre plus claire & splendide, & cependant que je m’employeray à ces religieux exercices, honorez moy s’il vous plaist, Monseigneur, Vostre tres-humble, et tres-affectionné serviteur, Le P. Boucher. (ã 4 v°)

Voicy un eschantillon de la piece que je desire te donner sur tous les jours de l’Advent, Caresme, Octave, Festes et Dimanches de l’année, si Dieu me continuë la vie & la santé.

Or dans cét eschantillon tu trouveras des discours utiles pour ton édification & instruction, que tu pourras facilement accommoder aux Evangiles du Caresme, jusques à ce que je t’en aye donné un, duquel j’espere (Dieu aidant) que tu recevras contentement. Mais prend patience, & en attendant voy cette ouvrage d’un bon oeil, Tu y trouveras plusieurs bonnes matieres deduites en forme de lieux communs, avec un tel ordre, & methode si facile, que sans grande peine tu en pourras faire ton profit. Excuse les fautes survenuës en l’impression, tant sur quelques mots Grecs et Latins que sur les dictions & phrases de nostre langue ; car les Predications que j’ay faictes, durant cét Esté dernier à sainct Eustache, & pendant l’Advent à sainct Estienne du Mont, ont esté cause que je n’ay peu me rendre assidu à la correction des fautes qui se glissent ordinairement dans les Impressions. Sois aussi courtois à les excuser, comme je suis affectionné à te servir, & tu me donneras courage à continuer mes labeurs, & mieux faire à l’advenir. (ã 5 r°)

Table des sermons contenus en ce livre. [6 pages] [Manassez de Preaulx, 1629].

Permission des Superieurs. [Manassez de Preaulx, 1629].
Nous soubs-signé F. Claude Mahuet Docteur en Theologie, Gardien des PP. Cordeliers de Paris, permettons au Pere Boucher Predicateur, faire imprimer un livre par luy composé intitulé, Les Thresors de la Pieté Chrestienne, supposées l’approbation des Docteurs, Fait à Paris ce 10. Janvier 1623.
F.C. Mahuet. (ã 8 r°)

À la fin du volume [Manassez de Preaulx, 1629].
Table des matieres contenues en ce livre. [10 pages]