Perle évangélique, Trésor incomparable de la sapience divine

A Excellente personne en doctrine et pieté, M. Buchard du Mont, Prestre Professeur de la saincte Theologie, Nicolas Eschius. [Veuve Guillaume de la Nouë, 1602]
D. S.
Vous sçavez (personnage tres-subtil & ingenieux) combien tout à faict il importe, qu’il y aye en l’Eglise de Dieu, des livres pieux & devots, comme sont ceux qui impriment & inculquent l’esprit de Jesus Christ en nos ames. Or tels sont ceux qui nous retirent, ou de la grande ardeur des vices, ou du bruit & trouble mondain, à penitence, qui est le premier degré de pieté : ou qui nous enseignent de mortifier nos membres sur la terre, & delivrer nostre esprit, voire des passions & affections (ã 2 r°) mesmes, ce qui est ravir par force le Royaume des cieux : ou qui la chair estant ja aucunement mortifiée nous eslevent en haut pour cognoistre & aimer l’esprit de Dieu, auquel nous venions à nous donner entierement en toutes choses. Ce qui à la verité ne se peut faire, si prealablement nous ne sommes exercez en sainctes meditations, és aspirations internes & pieux desirs vers Dieu, en sorte que nous ayons tousjours en main quelques exercices spirituels, au moyen desquels, non seulement nous arrestions les evagations [sic] de nostre esprit : mais aussi le cultivions de sainctes pensées & cogitations. Car incontinent que nous cessons de profiter, aussi tost necessairement s’ensuit diminution en nous, attendu que nostre ame ne peut durer en un mesme estat : c’est-à-dire, qu’elle ne prenne accroissement ou diminution & dommage en la vertu. Parquoy il nous convient d’un soing infatigable non seulement nous employer tousjours aux exercices de vertu, mais beaucoup plus devons nous perpetuellement d’une grande force & courage bataillier à l’encontre de ces vices, qui nous font le plus la guerre. Car la delectation des passions charnelles bataille bien avec plus de force en nos membres, que ne font les estudes & exercices de vertu en nos ames. Et afin que main- (ã 2 v°) tenant nous bataillions courageusement : (car la vie de l’homme est une guerre sur terre) faut en premier lieu que nous ayons une profonde cognoissance de nous mesmes. Bien souvent les affections & semences de plusieurs vices sont cachez en nous, lesquelles comme nous ne les sentons qu’à peine, ainsi à peine venons nous jamais à les extirper : & qui pis est (chose deplorable) la plus part de nous, à nostre escient, nous flattons nos vices, nous leur pardonnons, & leur donnons nourriture, qui est cause qu’en plusieurs années nous ne parvenons à un seul degré de vertu, & ne livrons la guerre à vice quelconque : (se ce n’est en chose qui paraventure seroit ordre & mal seante devant les hommes[)]. Mais certainement si nous ne voulons estre estimez execrables de nostre Dieu tres-bon & souverain, nous penetrerons de jour à autre de plus en plus les cachetes les plus secretes de nostre cœur, afin de voir & sçavoir, de quelle affection, de quel esprit, de quelle intention chaque chose est faicte, en paroles, en pensée, en conseils, & en œuvres. Je sçay fort bien, qu’à la verité le nombre est fort petit, de ceux de qui on puisse impetrer & obtenir ces choses si justes. Car la maniere de vivre d’aujourd’hui est telle, que chacun regarde aux exemples de la (ã 3 r°) multitude & du peuple, qui ne tient, & qui ne garde aucun ordre de vivre, & qui est conduict non tant par la raison, comme par une certaine impetuosité & coustume. Qui est celuy qui n’est induit par la multitude des pecheurs ? & je vous prie qui n’est sollicité par la multitude de ceux qui perissent à penser. Quoy ?  donques tout le monde perira ? C’est peu de gain certainement de nous vouloir targuer par les exemples de la multitude, & à compter souvent les vices d’autruy pour nostre consolation & defense, comme si nous avions faute d’autres à imiter, lesquels quand ils nous defaudroient icy bas, nous avons assez d’exemple en ceux que nous confessons en tel cas devoir estre imitez, & ce non seulement en Jesus Christ, mais encores és Apostres, és Martyrs, és Vierges, & en un nombre infini d’autres jeunes guerriers de l’un & l’autre sexe, tous lesquels par le mepris des richesses mondaines & des alechemens charnels, ont ravy le Royaume de Dieu : ce qui n’a esté sans avoir prealablement experimenté les moqueries, les fouets, les liens, les prisons, la pauvreté, les angoisses, les afflictions, dressans leurs yeux devers l’autheur de la foy, & consommateur Jesus, qui a joyeusement porté la croix, ayant mesprisé la confusion, & honte du (ã 3 v°) monde. Et nous doncques portans son vitupere, pourquoy, je vous prie, n’allons nous plustost au devant de luy hors du camp, que de continuer à imiter ceux, qui souz le nom de Chrestien meinent une vie mondaine, & qui tesmoignent autre chose par leur profession, autre chose par leur conversation ? Mais cet estude & exercice tres-necessaire au Chrestien, est maintenant au nombre des derniers, & de ceux desquels on fait peu d’estat, & le nombre est aujourd’huy fort petit de ceux qui font profession, & s’exercent à la Theologie mystique, & vie contemplative. La cause est, que la Theologie mystique, ou vie contemplative, requiert une ame pure & nette de tous vices, & ententive à la mortification de ses propres desirs, & outre qui aye le desir & volonté de s’exercer à pensées & meditations spirituelles. Tellement que cela ne nous doit sembler chose admirable, que mesme les hommes doctes & lettrez estiment cet estude, & rare & sans saveur, pourtant que ce leur est chose par trop griefve & fascheuse (comme ils estiment) d’acquerir le repos de l’esprit, par la mortification des passions & affections de l’ame : combien toutesfois  que ce soit chose impossible, que l’ame puisse jamais librement s’eslever vers Dieu son autheur, & (ã 4 r°) s’embrazer de son amour, si preallablement elle ne se rend quitte & libre de tout fardeau & pesanteur de peché. Or combien infiniment ceste estude excede toute volupté & douceur, celuy seul le sçait, qui le prend & le gouste. Or celuy le prend & le gouste, qui selon Jesus-Christ est humble, petit, & pauvre d’esprit, & qui, suivant le Sage, a pitié de son ame, & qui pour plaire à Dieu, tient & recollige son cœur & ses pensées en la saincteté de Jesus-Christ. Cela faisoit le Prophete, quand il meditoit en la loy de nostre Seigneur, jour & nuict, disant cela avec grande confiance à nostre Seigneur : La meditation de mon cœur est tousjours en vostre presence, A quoy n’est dissemblable le passage d’Esaie qui a dit : Je suis toute la journée sur l’eschauguette du Seigneur, & fay le guet & sentinelle sur moy toutes les nuicts. Quelle merveille doncques, si souz la loy de grace, les Chrestiens (la profession desquels est tres-saincte) font d’un esprit coy & tranquille : & si leurs cœurs interieurement s’eschauffent & viennent à brusler en la meditation des choses divines ? Certainement c’est à eux qu’il convient de prier, ayans les yeux interieurs tousjours dressez devers le ciel : Prier (dy je) d’esprit & de cœur, & quand il faut (ã 4 v°) psalmodier ou chanter, chanter d’esprit & de cœur, selon que nous exhorte l’Aspostre. Nous lisons d’Anne mere de Samuel, que multipliant ses prieres devant Dieu, elle parloit en son cœur, & n’y avoit que ses levres qui remuassent, sans que sa voix fust ouie aucunement : car elle avoit espandu son ame en la presence de son Seigneur. Combien à plus forte raison apres tant de benefices receux de la grace divine, l’ardeur & desir de contempler nous devroit-il maintenant absorber, ravir & induire au mespris des choses sensibles, & qui appartiennent à l’ornement du corps, comme choses prophanes, & nous faire estimer toutes choses comme sien, pour acquerir & gaigner nostre seul Seigneur Jesus-Christ, qui est aux pieux & devots, toutes choses en toutes choses. Mais pourquoy estimeras tu cela chose admirable à un homme Chrestien ? Si le philosophe, ignare de vraye pieté, pour toutesfois acquerir une gloire d’un moment, faisoit choses non moindres ? Anaxagoras mesprisa valeureusement ses heritages pour l’amour de la contemplation. Carneades estoit transporté tellement attentif à ce qu’il avoit conceu en son esprit, qu’estant à table il ne se souvenoit ny de manger ny de boire, ni ayant pris la viande en main, la porter jusqu’à sa bouche : mais (ã 5 r°) falloit que Melis sa femme prenant doucement sa main dextre, la portast au service de son corps, qu’il negligeoit & mesprisoit. Or quant à Archimede, un si grand soing & solicitude d’esprit luy avoit clos les yeux & oreilles, que avec l’estude il perdoit ensemblement aussi la vie, & joignoit la mort, au sommeil de contemplation, & veritablement vaine contemplation. Platon fait aussi mention de quelques Prestres à Athenes, ausquels on donnoit de l’argent public, lesquels avoient de coustume de vivre separez & esloignez du peuple, afin que leur chasteté ne fust pollué d’aucune souilleure, par laquelle le repos de leur contemplation & de leurs estudes peust estre interrompu ou troublé d’aucune chose : & estoient ces Prestres tellement ententifs aux choses qu’ils estimoient sacrées, que mesprisans tous les negoces, affaires & soing du monde, jamais ne visitoient leurs parents, jamais n’alloient voir leurs amis, mais pas mesmes leurs enfans : ains seulement presens au Temple, ils appliquoient entierement leurs esprits, & s’addonnoient à la contemplation des choses naturelles, & des astres, apres avoir accomply leurs sacrifices : & n’avoient accoustumé d’user de viandes grasses, ou delicates, ains des plus viles qui se trouvassent : comme d’hysope, de faulx, fleur de febves, (ã 5 v°) (d’où aussi ils estoient appellez Faviers, ou mangeurs de febves) afin que ainsi faisant, ils fussent plus aptes à la contemplation, à la continence, & au chant ? Que sont ces choses comparées & parangonnées aux delices & au luxe des Chrestiens ? que le Chrestien aye honte, que l’homme devot à Jesus-Christ, ou religieux rougisse, qu’il aye (dy-je) honte d’estre moins religieux que n’estoient ces Prestres des Dieux, ou pour mieux dire des demons. Ceux qui confessent qu’ils doivent actions de graces au Pere celestre, & à nostre Seingeur Jesus-Christ (comme nous le confessons tous) qu’ils ayent honte de ne sçavoir que c’est de ces sacrées meditations & contemplations. Beaucoup plus doivent-ils rougir de honte si volontairement ils refusent maintenant d’apprendre icy ce qu’ils ignorent. Et que sera-ce de ceux qui s’aiment en leurs tenebres, & qui ne veulent accepter la lumiere leur estant offerte ? Ils apprendront un jour à leur dame, & trop tard, ce qu’ils ne veulent maintenant salutairement apprendre. Cependant, je sçay bien que cela semble chose difficile, que l’esprit vagabond é distrait soit r’appellé & ramenè à la paix, tranquillité, & solitude : aussi ne deniay-je point qu’en cet esprit ne soit requis, que Jesus Christ promet donner à ceux qui le demanderont, & qui le (ã 6 r°) chercheront : mais si le combat est difficile, la victoire en est plus belle : si le labeur est fascheux, la recompense est grande : la multitude des douleurs est recompensée par la grandeur des consolations de Dieu. Et ce n’est en vain que jadis l’on a dit & creu, que les choses belles sont difficiles, jaçoit qu’il n’y aye rien de si difficile & fascheux, que l’usage & exercice ne rende en fin facile, leger, & plaisant. C’est une vieille sentence : Par le labeur & diligence toute difficulté est amollie. Quoy ? Se peut-il bien trouver quelqu’un si delicat qui aye opinion, que c’est chose difficile & fascheuse de parler avec Jesus Christ, vivre familierement avec les Saincts, & les Anges, admirer Jesus Christ, sinon en tant qu’homme parfaict, du moins le contempler enfant, le baiser enfançon, penser qu’il est humble, ouyr ses enseignemens, & finalement en toutes choses avoir Jesus Christ és oreilles, & devant les yeux ? Mais je vous prie rememorez sa Nativité, Circoncision, Apparition, Oblation, exil, obedience, Baptesme, jeusne, predication, miracles, benefices, & finalement toute sa Passion, quelle difficulté apporte cela au Chrestien ? Il a souffert choses si grandes & si extremes, tant d’années pour l’amour de toy (ô homme) & tu perseveres encores tellement (ã 6 v°) e n ton ingratitude, qu’à grand’peine daignes-tu penser aux tresfascheuses & griefves peines qu’il a souffertes pour toy.

Certainement qui voudra tant soit peu estre diligent, il y a icy (par manière de dire) la viande maschée, il y a pres de soy un champ fertile & abundant, au milieu duquel, comme parmy tresgracieuses prairies, il peut discourir, se pourmener, & cueillir toutes sortes de fleurs. Premierement comment il se doit contempler exactement soy-mesme, recognoistre les forces, puissances, operations & sens de son ame, & icelles cogneües, voir par quelle maniere il pourra d’esprit, & d’ame, & de corps totalement retourner à Dieu seul sont autheur & createur. En apres par quels moyens il pourra respondre, tant par priere, que par sa bonne vie, aux benefices de la vie & Passion de Jesus Christ, afin que les merites de l’humanité du fils de Dieu nous soient appliquez, nous sauvent & nettoyent, & principalement l’efficace de son tresprecieux sang, par lequel les pechez de tout le monde sont effacez, Outre ce, qu’il considere quelles voyes nous devons tenir, pour nous eslever à la sublimité de Dieu par l’humanité de nostre Sauveur, afin qu’entrans par la vraye porte Jesus Christ, nous soyons sauvez, entrions & sortions, & trou- (ã 7 r°) vions finalement les pasturages : & que ne vivions tant à nous, comme Jesus Christ lui-mesme vivra, & aura vigueur en nous : Afin encores qu’il n’y aye rien plus en nous qui repugne & contrarie à son commandement & volonté, ains qu’il nous soit tout en toutes choses, adherions à luy perpetuellement & fidelement, prenions de sa bouche un baiser tres-salubre : & finalement sentions dedans nous combien il est doux en ses divins embrassemens. Le lecteur, principalement s’il est de ceux qui ont coustume de reprendre, trouvera icy plusieurs choses à redire, & ce n’est merveille, car si és œuvres des Peres, voire des plus saincts, se sont trouvées plusieurs choses, lesquelles facilement ont esté calomniées & reprises : combien à plus forte raison sera il juste & raisonnable de pardonner aux aristarques & censeurs de ce livre cy, si en aucuns lieux il semble discorder, non à l’Eglise (avec laquelle il accorde tousjours) mais bien aux Philosophes en aucuns passages ? Car l’autheur (qui que ce soit) a plustost voulu mettre en lumiere des choses pieuses & devotes, que doctes & fardées, pour autant principalement qu’il escrivoit pour les simples, desquels ce livre a tousjours esté jusques icy tresavidement & desireusement receu : de sorte que souvent il a esté remis de nou- (ã 7 v°) veau soubs la presse avec beaucoup de fruict. Et outre ce qu’une infinité de personnes l’approuvent, plusieurs tres-approuvez & tres-pieux personnages tesmoignent que la lecture leur a souventesfois merveilleusement profité. Ce qui a esté cause qu’avec tout soin ils ont requis que ce thresor fut aussi communiqué aux estrangers, c’est-à-dire, qu’estant mis en Latin il parvint és main d’un chacun, ce qui a esté aussi tost accomply, à la grande expectation de plusieurs. Il ne faut pas, comme j’avois commencé de dire, que l’auctorité de ce livre coure danger ou peril d’estre amoindrie, à raison qu’en tous lieux il ne correspond possible pas aux subtilitez Philosophiques & scholastiques, comme quelqu’un paraventure pourra se pleindre à tort, avoir esté faict en la partition, ou division des forces de l’ame. Mais en ces lieux là nous requerons le lecteur benin qu’il lise en telle façon ces choses, qu’en fin il vienne à diligemment s’accoustumer à ce sainctes meditations, & qu’en les lisant il vienne à se revestir tototalement de Jesus Christ. Quant à l’autheur, il n’importe en rien de dire qu’il est, attendu que cy devant il n’a oncques souffert d’estre nommé (comme tresgrand observateur de toute humilité & modestie) ne que aucune chose de ce sien œuvre luy fut attri- (ã 8 r°) buée, ains tout ce qui semble de bon & pieux en iceluy, le refere & attribue à Dieu, autheur de toutes choses, à la gloire duquel il a amassé toutes ces choses cy, apres s’estre plusieurs années tresdiligemment exercé en icelles, j’ay veritablement voulu ce livre vous estre nommement dedié (tres-celebre M. Bruchard) afin que selon vostre incredible erudition & doctrine vous ingeassiez de ceste version & la defendissiez contre les calomnies des envieux. Nostre Seigneur Jesus, vueille chasser loing de nous toute prudence seculiere, & inserer en nos cœurs, ceste sienne tressage folie, à ce que nous cherchions seulement par ensemble les choses qui sont a nostre edification. (ã 8 v°)