Trésor de dévotion contenant plusieurs oraisons dévotes et exercices spirituels

Desquels pour ce regard, vostre equité est si bien cognue, que les moindres confessent avoir tousjours eu occasion de vous en remercier ; & les plus grands de vous respecter & honnorer. En quoy, le bien (n.p., changement de page) & profit que vous faictes, est d’autant plus digne & honnorable ; comme il est plus commun, & se repartit a plusieurs. Car la Justice, de laquelle vous estes le vrays [sic] gardiens, sur toutes les autres vertus, ha cela de propre ; que le fruict, qu’elle produict, s’estend plus a l’endroict  de beaucoups [sic] d’aultres, que de celuy qui l’exerce. Or, ce qui cause d’aultrepart grand partie de vostre louange, est le soing & la faveur, que vous portés a ceste Royale Université ; honorant en tous endroicts les gens de scavoir, & de vertu ; pour les provoquer a faire chose digne d’eulx & de vous : Oultre les beaux edifices, que vous y avez faict eriger ; pour laisser une mémoire perpetuelle de vostre vertu, & un ornement durable pour vostre patrie ; qui en sera d’autant plus renommée (n.p., changement de page) entre les nations estranges & recommandée par la posterité, pour y veoir establie par vous la demeure des Muses ; c’est-à-dire ; des sciences divines & humaines : lesquelles ont bien ce pouvoir, que d’immortalizer ceux qui les favorisent. Mais au reste, vostre fidelité s’est tousjours monstrée telle vers nostre Prince, qu’elle merite bien plus grande recompense, que la simple louange que l’on vous en pourroit rendre a juste tiltre. De tant plus ; mesme qu’elle est joincte avecq une singuliere pieté, laquelle vous est comme propre, & nayve, a cause de la renommée, que vous avez eu de toutz temps, d’avoir perseveré francs & entiers en la vraye & sincere religion Catholique & Romaine, principalle deffence & sauvegarde des villes, laquelle entre (changement de page) les aultres causes, m’a mis entre les mains ce petit opuscule de Prieres, aultrefois imprimé, & bien receu en plusieurs langues. Lequel aiant esté puis n’agueres pour vostre commodité traduict en la vostre, par M. Nicolas de Fraxinis Licentié [sic] en la S. Theologie, m’a semblé chose propre pour vous en faire un present, non pas tant pour le grand apparat & l’eloquence, que je vueille dire y estre, ou pour l’ouvraige de taillure que j’ay faict graver pour y servir d’ornement, que pour la gravité du suject, & qu’il traicte de la pieté, de laquelle sur tous aultres, vous avez tousjours eu fort bonne reputation ; & comme pour addresser aux gouverneurs de ceste florissante ville, ce qui est dedié premierement au souverain Gouverneur & maistre de toutes (n.p., changement de page) choses. Qui ne sera, sans vous supplier de prendre de bonne part, l’affection, dont il vous est presenté ; qui n’est, que pour tascher de vous faire service ; ensemble de continuer vostre faveur & bienveillance accoustumée vers celuy, lequel vous avez tousjours favorisé, des le commencement de ceste Université ; esperant de s’efforcer par cy apres a faire chose qui sera autant, ou plus aggreable. A tant, Messeigneurs, je prye le Createur vous vouloir donner avec accroissement d’honneur, toute prosperité & heureux succés en vostre gouverment. De vostre mainson a Douay ce xxiiij. De Julet [sic] M.D. Mxxiiii.L’entierement vostre affectionné en service Jean Bogard. (n.p.)