Extrait : 1540c [Denis Janot] La châtelaine de Vergi BnF Extrait 14

Informations générales

TitreExtrait : 1540c [Denis Janot] La châtelaine de Vergi BnF Extrait 14

Les pages

En passant la souris sur une vignette, le titre de l'image apparaît.

7 Fichier(s)

Relations entre les documents

Collection Exemplaire : 1540c [Denis Janot] La châtelaine de Vergi BnF

Ce document a pour suite :
Extrait : 1540c [Denis Janot] La châtelaine de Vergi BnF Extrait 15

Collection Exemplaire : 1540c [Denis Janot] La châtelaine de Vergi BnF

Texte intégral : 1540c [Denis Janot] La châtelaine de Vergi a pour partie ce document

Extrait : 1540c [Denis Janot] La châtelaine de Vergi BnF Extrait 13 a pour suite ce document

Afficher la visualisation des relations de la notice.

Transcription du texte

Titre de l'extraitSéquence 14. Comment le Duc receu amyablement sa niepce la dame du vergier

Transcription

Comment le Duc receu amyablement sa niepce la dame du vergier.

[illustration]

Le Duc.
Dieu vous gard de mal encombrier
Ma niepce pleine de beaulté
Joyeulx suis par ma loyaulté
Qu'estes venu au mandement
Que vous ay faict, par mon serment
De vous veoir j'ay tresgrand plaisir.

La Dame.
Preste suis de vostre desir
Acomplir, mon trescher seigneur.

Le Duc. (E ii r°)
Je vous remercy de bon cueur
Ma niepce, faictes bonne chere
Je vous donne m'amour entiere
Je vous prometz Dieu & mon ame.
Venez avant ma chere femme
Allez passer vostre jeunesse
Avecques m'amye ma niepce
Et vous me ferez grand plaisir.

La Duchesse.
J'acompliray vostre desir
Et feray vostre volunté,
Sa Dame pleine de beaulté
Venez dancer la basse dance.

La Dame.
Rendre vous veulx obeyssance
Madame, car s'est bien raison.

La Duchesse.
Avez vous veu vostre mignon
Le gentil galant Chevalier
Dictes madame du vergier
Affaicté avez le chiennet
Dont vostre cas n'est pas trop net
Je le vous dy priveement.

La Chastellaine.
Je ne scay quel affaictement (E ii v°)
Vous pensez, Madame pour voir
Talent je n'ay d'amy avoir
Qui ne soit du tout à l'honneur
De mon oncle, mon cher seigneur
Autrement je seroys traystresse.

La Duchesse.
Vous estes tres bonne maistresse
Qui avez apris le mestier
Du petit chiennet affaictier
Chastellaine tant vous en dy.

La Chastellaine.
Helas vray Dieu dont vient cecy
Maintenant je suis bien trahye,
Dont procede la villennie
Qui sur moy a este gectée,
Las chetive desconfortée
Or congnoys je bien maintenant
Que failly a au convenant,
Mon amy que tant fort j'aymoye,
Helas mon soulas & ma joye,
Mon plaisir, toute ma lyessse
Pas bien n'avez tenu promesse,
Quel desplaisir vous ay je faict
Ne en quoy vous ay je forfaict
Certainement jour de ma vie (E iii r°)
Envers vous ne feis villennie
Quant dedans le vergier entraste
Foy & loyaulté me juraste
Que la tiendriez entierement
Et maintenant voy clerement
Que vous avez faict le contraire,
Las chetive que doibtz tu faire
Quant tu as perdu ton desir
Ton soulas, & tout ton plaisir
Tout ton cueur, ton esbatement
Certes je m'esbahys comment
Il m'a esté si desloyal
Plus le maintenoye feal
Que trestous les hommes du monde
Helas quelle douleur parfonde
Il a mis à mon paovre cueur
Helas vray Dieu & vray seigneur
Comment avez le cueur si fier
De ma mort querir & cercher
Dont vous procede ce couraige
De m'avoir faict si grand oultraige,
Bien scavez que jour de ma vie
Envers vous ne feis villennie,
Ne chose qui vint à reproche
Vous jurastes de vostre bouche (E iii v°)
Que me tiendrez le compromis
Que vous & moy avions promis
Mais or congnoys je maintenant
Que faulce avez faulcement
Vostre serment, dont avez tort
Mais je considere au fort
Que de ce faire avez raison
Car je croy qu'en autre maison
Plus belle dame avez conquise
Que moy, & aussi mieulx apprise
Je suis seure que la Duchesse
Si est vostre dame & maistresse
Bien je congnoys & appercoy
Que vous l'aymez trop plus que moy
Se Dieu ait de m'ame pitié
Plus vous aymoye la moytié
Que moy, je vous jure mon ame
Vous m'avez faict trop grant diffame
De m'avoir ainsi dessellée (me
Mon amour vous avoys donnée
Comme celluy qui tant j'aymoye
Boire ne manger ne povoye
Se je n'estoye avecq vous,
Helas mon cueur, mon amy doulx
Et que vous ay je faict ne dit (E iiii r°)
Envers vous aucun contredit,
Jamais ne feis certainement
Je vous aymoye si loyaulment
Qu'il n'est possible à creature
De plus aymer, je vous asseure
Quant avecq moy vous estiez,
En me baisant vous me disiez
Que m'aimiez de bon cueur & dame
Et que j'estoye vostre dame,
Vous le disiez si doulcement
Et je vous croyois fermement,
Point n'eusse cuidé à nul seur
Que eussiez tourner vostre cueur
Ne pour Royne, ne pour Duchesse
Ne pour Dame de grand haultesse
Comme avez faict, dont suis dolente
En vous j'avoye mon entente
Plus qu'en tous les hommes du monde
S'il n'est ainsi, Dieu me confonde
Et que meure cruellement,
Helas mon amy, & comment
Avez vous eu si faulx couraige
Ung chascun vous tenoit si saige,
Si doulx, si courtoys, si begnin,
On ne sceut jamais que venin (E iiii v°)
Vous portissiez en jour de vie
Mais maintenant m'avez trahye,
Helas, helas pour Dieu mercy,
Pourquoy suis je trahye ainsi,
J'ay esté si treslonguement
Sans avoir amy nullement
Et si faulcement m'a deceue,
Helas pourquoy suis je venue
À ceste langueur orendroit
Las que feray, est ce doncq droict,
Que j'aye mal contre le bien,
C'estoit tout mon cueur, & mon bien
Tout mon soulas, & mon amour,
Je suis pleine de grand doulour
Or puis je bien crier helasse,
Que sera ceste paovre lasse
Si grand courroux au cueur en ay
Que de plus vivre cure n'ay,
Ne ma vie ne me plaist point
Je prye Dieu que la mort me doint
Et que tout ainsi vrayement
Comme j'ay aymé loyallement
Cellui qui ce ma pourchassé
Ait Dieu de mon ame pitié. (E 5 r°)
Retour à la version réduite

Transcripteur.rice

Djafri, Khaire ddine
Lichtlé, Lola
Sayyahi, Samar

Chargé.e de la révision

Carli, Vittoria (2023)
Révision effectuée par la formation doctorale "Édition critique numérique et recherche collaborative" (UHA-Unistra, 2021-2022)

Informations sur la notice

ÉditeurÉquipe Tragiques Inventions, Magda Campanini (Univ. Ca' Foscari-Venezia), Anne Réach-Ngô (UHA, IUF) ; EMAN (Thalim, CNRS-ENS-Sorbonne nouvelle)

Mentions légalesFiche : Équipe Tragiques Inventions, Madga Campanini (Université Ca' Foscari), Anne Réach-Ngô (UHA, IUF) ; EMAN (Thalim, CNRS-ENS-Sorbonne nouvelle). Licence Creative Commons Attribution – Partage à l’Identique 3.0 (CC BY-SA 3.0 FR)

Exporter cette fiche

atom, dcmes-xml, json, omeka-xml

Exporter en PDF les métadonnnées
Exporter les 7 transcriptions dans un fichier XML
Exporter en PDF les métadonnées et les 7 images

Notice créée par Romane Marlhoux Notice créée le 23/11/2021 Dernière modification le 24/05/2023